aae to yuuñ ki jaise hamesha the mehrbān
bhūle to yuuñ ki goyā kabhī āshnā na the
āīna dekh apnā sā muñh le ke rah ga.e
sāhab ko dil na dene pe kitnā ġhurūr thā
ā.īna kyuuñ na duuñ ki tamāshā kaheñ jise
aisā kahāñ se lā.ūñ ki tujh sā kaheñ jise
aa.ina dekh ke kahte haiñ sañvarne vaale
aaj be-maut mareñge mire marne vaale
aa.ina ye to batātā hai ki maiñ kyā huuñ magar
aa.ina is pe hai ḳhāmosh ki kyā hai mujh meñ
aa.ine se nazar churāte haiñ
jab se apnā javāb dekhā hai
aañkh dekhe binā nahīñ rahtī
hoñT to ḳhair sī liye ham ne
aañkh jo kuchh dekhtī hai lab pe aa saktā nahīñ
mahv-e-hairat huuñ ki duniyā kyā se kyā ho jā.egī
aañkh rahzan nahīñ to phir kyā hai
luuT letī hai qāfila dil kā
āñkheñ dikhlāte ho joban to dikhāo sāhab
vo alag bāñdh ke rakkhā hai jo maal achchhā hai
āñkheñ jo uThā.e to mohabbat kā gumāñ ho
nazroñ ko jhukā.e to shikāyat sī lage hai
āñkheñ ḳhudā ne dī haiñ to dekheñge husn-e-yaar
kab tak naqāb ruḳh se uThā.ī na jā.egī
āñkheñ khulīñ to jaag uThīñ hasrateñ tamām
us ko bhī kho diyā jise paayā thā ḳhvāb meñ
āñkheñ saaqī kī jab se dekhī haiñ
ham se do ghūñT pī nahīñ jaatī
āñkhoñ meñ hai lihāz tabassum-fizā haiñ lab
shukr-e-ḳhudā ke aaj to kuchh raah par haiñ aap
āñkhoñ meñ rahā dil meñ utar kar nahīñ dekhā
kashtī ke musāfir ne samundar nahīñ dekhā
aao husn-e-yaar kī bāteñ kareñ
zulf kī ruḳhsār kī bāteñ kareñ
aafat to hai vo naaz bhī andāz bhī lekin
martā huuñ maiñ jis par vo adā aur hī kuchh hai
aage baḌhe na qissa-e-ishq-e-butāñ se ham
sab kuchh kahā magar na khule raaz-daañ se ham
aage hī bin kahe tū kahe hai nahīñ nahīñ
tujh se abhī to ham ne ve bāteñ kahī nahīñ
aage mire na ġhair se go tum ne baat kī
sarkār kī nazar ko to pahchāntā huuñ maiñ
aaj tak dil kī aarzū hai vahī
phuul murjhā gayā hai bū hai vahī
aaj us ne hañs ke yuuñ pūchhā mizāj
umr bhar ke ranj-o-ġham yaad aa ga.e
aap aa.e haiñ so ab ghar meñ ujālā hai bahut
kahiye jaltī rahe yā sham.a bujhā dī jaa.e
aap ke qurb se pahle mujhe ma.alūm na thā
zindagī itnī dil-aavez bhī ho saktī hai
aap kī maḳhmūr āñkhoñ kī qasam
merī mai-ḳhvārī abhī tak raaz hai
aap lillāh na dekhā kareñ ā.īna kabhī
dil kā aa jaanā baḌī baat nahīñ hotī hai
aap ne tiir lagāyā to koī baat na thī
zaḳhm maiñ ne jo dikhāyā to burā maan ga.e
aap to muñh pher kar kahte haiñ aane ke liye
vasl kā va.ada zarā āñkheñ milā kar kījiye
ārizoñ par ye Dhalakte hue aañsū tauba
ham ne sho.aloñ pe machaltī huī shabnam dekhī
aarzū terī barqarār rahe
dil kā kyā hai rahā rahā na rahā
aarzū vasl kī rakhtī hai pareshāñ kyā kyā
kyā batā.ūñ ki mere dil meñ hai armāñ kyā kyā
aatā hai jī meñ saaqi-e-mah-vash pe baar baar
lab chuum luuñ tirā lab-e-paimāna chhoḌ kar
ab aur is ke sivā chāhte ho kyā 'mullā'
ye kam hai us ne tumheñ muskurā ke dekh liyā
ab maiñ samjhā tire ruḳhsār pe til kā matlab
daulat-e-husn pe darbān biThā rakkhā hai
abhī aa.e abhī jaate ho jaldī kyā hai dam le lo
na chhoḌūñgā maiñ jaisī chāhe tum mujh se qasam le lo
abhī aate nahīñ us rind ko ādāb-e-mai-ḳhāna
jo apnī tishnagī ko faiz-e-saaqī kī kamī samjhe
abhī kuchh hai abhī kuchh hai abhī kuchh
tirī kāfir-nazar kyā jaane kyā hai
abhī raat kuchh hai baaqī na uThā naqāb saaqī
tirā rind girte girte kahīñ phir sambhal na jaa.e
abrū na sañvārā karo kaT jā.egī uñglī
nādān ho talvār se khelā nahīñ karte
achchhe iisā ho marīzoñ kā ḳhayāl achchhā hai
ham mare jaate haiñ tum kahte ho haal achchhā hai
adā se dekh lo jaatā rahe gila dil kā
bas ik nigāh pe Thahrā hai faisla dil kā
adab laakh thā phir bhī un kī taraf
nazar merī aksar rahī dekhtī
agar tumhārī anā hī kā hai savāl to phir
chalo maiñ haath baḌhātā huuñ dostī ke liye
agar vo pūchh leñ ham se tumheñ kis baat kā ġham hai
to phir kis baat kā ġham hai agar vo pūchh leñ ham se
ai junūñ haath jo vo zulf na aa.ī hotī
aah ne arsh kī zanjīr hilā.ī hotī
ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-baam aa jaa.e
No comments:
Post a Comment