Bachpan Shayri
bachpan meñ ham hī the yā thā aur koī
vahshat sī hone lagtī hai yādoñ se
vahshat sī hone lagtī hai yādoñ se
baḌī hasrat se insāñ bachpane ko yaad kartā hai
ye phal pak kar dobāra chāhtā hai ḳhaam ho jaae
bachchoñ ke chhoTe hāthoñ ko chāñd sitāre chhūne do
chaar kitābeñ paḌh kar ye bhī ham jaise ho jā.eñge
bhale lagte haiñ schōloñ kī uniform meñ bachche
kañval ke phuul se jaise bharā tālāb rahtā hai
chup-chaap baiThe rahte haiñ kuchh bolte nahīñ
bachche bigaḌ ga.e haiñ bahut dekh-bhaal se
duā.eñ yaad karā dī ga.ī thiiñ bachpan meñ
so zaḳhm khāte rahe aur duā diye ga.e ham
duniyā jise kahte haiñ jaadū kā khilaunā hai
mil jaa.e to miTTī hai kho jaa.e to sonā hai
faqat maal-o-zar-e-dīvār-o-dar achchhā nahīñ lagtā
jahāñ bachche nahīñ hote vo ghar achchhā nahīñ lagtā
ham bhī in bachchoñ kī mānind koī pal jī leñ
ek sikka jo hathelī pe sajā laate haiñ
jab bachchoñ ko dekhtā huuñ to sochtā huuñ
mālik in phūloñ kī umr darāz kare
jahāñ zideñ kiyā kartā thā bachpanā merā
kahāñ se lā.ūñ khilaunoñ kī un dukānoñ ko
jis ke liye bachcha royā thā aur poñchhe the aañsū baabā ne
vo bachcha ab bhī zinda hai vo mahñgā khilaunā TuuT gayā
jitnī burī kahī jaatī hai utnī burī nahīñ hai duniyā
bachchoñ ke schōl meñ shāyad tum se milī nahīñ hai duniyā
kāġhaz kī naav bhī hai khilaune bhī haiñ bahut
bachpan se phir bhī haath milānā muhāal hai
kisī ne rakh diye mamtā-bhare do haath kyā sar par
mire andar koī bachcha bilak kar rone lagtā hai
kitnā āsān thā bachpan meñ sulānā ham ko
niiñd aa jaatī thī pariyoñ kī kahānī sun kar
koī schōl kī ghanTī bajā de
ye bachcha muskurānā chāhtā hai
maiñ apne bachpane meñ chhū na paayā jin khilaunoñ ko
unhī ke vāste ab merā beTā bhī machaltā hai
merā bachpan bhī saath le aayā
gaañv se jab bhī aa gayā koī
uḌne do parindoñ ko abhī shoḳh havā meñ
phir lauT ke bachpan ke zamāne nahīñ aate
No comments:
Post a Comment